Нестеров И.В. Круг чтения русского средневекового человека. Литература XIII – XV вв. Часть V. Повесть о Тимофее Владимирском (Текст)

11 июня, 2019

Нестеров И.В. Круг чтения русского средневекового человека. Литература XIII – XV вв. Часть V. Повесть о Тимофее Владимирском (Текст) (12 Kb)

Исследование Повести о Тимофее Владимирском публиковалось нами ранее (http://www.opentextnn.ru/history/istochnik/istXIII-XIX/?id=2816), но без текста памятника. Восполняем этот пробел.
Повесть о Тимофее Владимирском [Текст]: первая редакция / подгот. М. О. Скрипиль // Труды Отдела древне-русской литературы. – М.-Л., 1951. – Т. 8. – С. 300–304.
Повесть о Тимофее Владимирском
Первая редакция
Текст издается по списку ГПБ. Q. XVII. № 199.
К этой же редакции относятся списки:
1.      ГИМ. Уваров. № 1912 (157)
2.      Библ. им. В. И. Ленина, Большак. № 391
3.      ГИМ. Барсов. № 2134
4.      Библ. им. В. И. Ленина, № 1529 (Беляев. № 23)
5.      ГПБ. О. I. № 72 (Толст. II. 85)
6.      ГПБ. Титов. № 540
7.      Инст. истор., языка и лит. Карело-Финской базы АН СССР № 47 (167)
8.      БАН. 21. 8. 10 (Сев. 695)
9.      ГИМ. Хлудов. № 36
10.  Инст. истор., языка и лит. Карело-Финской базы АН СССР № 208
11.  БАН. Арханг. собр. № 429
12.  ГИМ. Муз. № 3033
13.  ГИМ. Уваров. № 2053 (1084)
14.  ГИМ. Щукин. № 692
15.  ГПБ. Погод. № 1603
16.  ГИМ. Барсов. № 934 (старые № 139 и 202)
17.  ГИМ. Востряк. № 1156
Повесть о презвитере впадшем в великии грех тяжкии, иже бысть в Русскои земли в княжение государя и великаго князя Ивана Васильевича Московскаго и всея Русии и при митрополите Филиппе.
Бе во граде Владимире презвитер некии живыи именем Тимофеи. Случи же ся ему быти по божию попущению искус сицев на пагубу души его.
В первую убо неделю святаго и великаго поста обычаи имут православнии христиане боголюбивии людие, мужие и жены и младые дети поститися во всю неделю. Постивше же ся в пяток вечера ко отцем духовным на покаяние приходити и о гресех своих очищатися, и в суботу на литоргии приимати святое тело и кровь Христа бога нашего. Тако же и к сему попу Тимофею прииде на исповедание грехов своих девица некая, красна зело, дщи славных града того. Бысть же има наедине в церкви двема и начат презвитера диявол на неутолимую похоть разжигати. Презвитер же не могии терпети разгорения плоти своея и падеся з девицею в церкви, не убояся божия суда и вечнаго мучения лютаго.
И сотворив грех з девицею и убояся изымания и побежа ис церкви вон в дом свои. И утаяся всех людеи, да не явлен будет властелем града того да бы ему злою смертию не умрети. И оседла конь свои и пременив образ свои поповскии и облечеся в воинскую одежду, и неявися и несказася жене своеи, ни детем своим и всед на конь скоро погна из дому своего. И из града своего бежа на чюждую страну в поганую землю татарскую, в Казань.
И тако во орду прибежав и вдадеся царю казанскому служити и отвержеся веры християнския и священническии чин попра и бусарманскую срацынскую злую веру прият и взят себе две жены.
Ох, увы, первие бе чиститель и говеин священник и предстатель престолу божию и поручник грешных душ, потом же зол гонитель бысть и лют кровопиица христианеск и воевода в Казани храбр. И часто его посылаше царь с татары своими воевати отечество его русския земли християн. Живяше же он тридесять лет в Казани; царю служил и разбогател вельми.
Бог же, не хотя смерти грешнику, но еже обратитися ему и живу быти, восхоте же и сего преступника в первое благочестие привести.
По времени же посла его царь на то же обычное и беззаконное дело, яко же и прежде пролияти кровь неповинных руских людеи. Он же иде по словеси царя и возвратися в Казань с руским полоном. Идущу же ему чистым и великим полем к Казани и пусти полк свои напереди себя, сам же един остася назади (некоего) ради орудия. Едущу же ему на коне своем вполудни после полка своего далече остася и пояше умилно красныи стих любимыи пресвятеи богородице: «О тебе радуется обрадованная всякая тварь».
Тогда же по случаю бежа пленник ис Казани некии отрок русин и западе лежаще утаяся в дуброве по страну пути того, ждущи докуду минет весь полк татарскии, чтобы востати от места того, и паки бы побежать, не блюдяся к Руси.
И егда отрок, слыша поюща стих, и востав от лежания своего, и мнев поюща стих быти русина, не бояся, радостен изыде оттуду и потече из дубровы на путь свои и явися тому окаянному варвару, прежде бывшему попу. Он же видя отрока ярыма своима очима звериныма и похватив мечь наг и хоте отроку главу отсещи. Пленник же паде на земли, з горкими слезами милости прося у него, чтобы не убиен был от него. И сказа ему о себе, яко «пленник есмь русин, бежа ис Казани на Русь и слышах тебя по руски поюща великии стих богоматере, еже любезнеиши есть тои стих всех стихов богородичных и у нас его на Руси честно поют, славяще пресвятую богородицу молебницу и заступницу нашу. И чаях тебя русина быти и явихся, господине, лицу твоему, не бояся». Преступник же, то слыша, и жестокое и каменное свое сердце во умиление положи, и нача великим гласом жалостно плакати и рыдати и сшед с коня о землю убивашеся, яко устрашитися отроку тому и вмале не побежа от него, дивяся в себе, что се таково сотворилося, бе бо и отрок тои грамотен же. И плакася от полудне того до вечера, донележе гортань его премолча, и слезы исчезоста от очию его. И обозреся со отроком ту и спа до утра на траве, дав отроку мало нечто снести, сам же ничего не вкуси.
Пленик же нача прилежно вопрошати, глаголя: «Что се, господине, есть и что плачь твои и почто горко плачеши, повеждь ми рабу своему». Он же устранися от плача и мало пришед в себе, все отроку вышеписанное поведа, яко поп на Руси был. Пленник же увещеваше его на покаяние обратитися, яко бог наш милостив есть и кающихся от грех очищает. Он же рече отроку: «Молю тя, отроча, и заклинаю тя богом вашим Исусом Христом, пришедшим в мир грешники спасти, да сотвориши ми любовь духовную; иди ныне от мене без боязни к Москве на Русь и пришед возвести о мне вся митрополиту вашему, еже сказати, аще есть такому грешнику покаяние, и они бы меня восприяли и запретили и простили, како подобает по заповеди господа нашего Исуса Христа; дабы и попечаловался о мне великому князю московскому, дабы и он простил во всем моем зле, еже много лет воевах землю его и христианство губя. Да рукописание бы прощения мне во всем написав, и двема печатми запечатав, великаго князя печатью, да своею другою печатью, да тогда веру иму, и поехал бы к Москве без боязни. Да по двою месяцу прислал бы ми с тобою на сие же место, и аз бы с радостию и без сумнения к Москве ис Казани приехал и вдался бы я в монастырь плакатися грехов своих. Ты же, брате, потрудися бога ради о мне всем сердцем своим без лености. Господь же ради труда твоего мзду воздаст ти во царствии небеснем». И одари отрока сребром немало. И обеща ему отрок истинно и неложно повеленное им сотворити.
И воставше заутра и такоже много плакався бусурман тои, и целовавшеся оба и разехавшеся. Отрока отпусти к Руси, а сам х Казани за полком своим скоро погна.
Отрок же к Москве пришед и скоро сказа вещь сию митрополиту Филиппу. Истинныи же пастырь церкви Христове в тои же час скоро шед в полату и возвести сыну своему духовному великому князю все поряду и подробну, еже что ему отрок сказа. Князь же великии и митрополит умилишася зело и в размышлении оба надолзе быша, и призваша отрока паки пред себя вопрошающе его: «Истинно ли тако бысть». Отрок же паки то же сказа им истинну подробну, и помянуша они евангельское слово реченное: «Аще изведеши честное от недо­стоинства, яко уста моя будеши». И советовавше между себе князь же и митрополит и написавше грамоту и запечатавше своими печатми и послаша со отроком к бусорману тому и прощение ему, покаявшемуся и возвратившемуся от тмы во свет, сказаша, и во всем его простиша и наказавше звати его, чтобы ехал к Москве безо всякия боязни и да будет честен в службе великому князю.
Наставшу же третиему месяцу, пленник, отрок тои, тщашеся безо лжи любовь божию сотворити и тамо итти; то бо есть любовь истинная, кто положит душу свою за брата своего. И иде отрок полем многия дни до уреченнаго места того и поспе на срок свои и ту пришед ждаше бусормана два дни и мнев яко же не быти ему.
В третии же день, зряше отрок прилежно х Казани, прямо на горе высоце на древо возлезе; узре: и се гнаше полем един человек от Казани путем на дву скорых драгих конех своих к месту тому, вельми спешася. Отрок же позна, яко тои есть друг его бусорман и вмале скрыся от него, искушая его. Он же прискочи на место то, и невиде отрока, чаяше, яко солгах ему, и не пришедша во уреченныи час и день. И свержеся с конеи своих долу на землю и плакася вельми горко, яко могущу что и самое камение с собою на плачь подвигнути, и не можаше от плача утешится, верстою бы он в пятьдесять лет быв. Такоже скоро отрок явися ему. Он же видев его борзо з горы идуща к себе и такоже позна его и потече скоро к нему против у его, и объем паде на выю отроку и целуя его и плакася з горкими слезами, глаголя ему: «Что ти воздам, любимыи мои брате и нелестныи друже и верныи посланниче и великотрудниче, еже о мне поганом сотворил еси». Отрок же взем влагалище из-за пазухи своея и разверг и вынял из нея грамоту и даде ему. Бусорман же приим и прочте со многими слезами и вопияше непрестанно гласом мытаревым: «Боже, милостив буди мне грешному беззаконному преступнику. Боже очисти грехи мои и помилуи мя». И простер руце свои на небо и рече: «Боже щедрыи, благодарю тя, человеколюбче, грешным милостиве, яко сподобил мя еси, окаяннаго, от начальнаго пастыря моего беззаконию моему прощение приятии». И абие внезапу пад на землю тихо. И нозе свои, яко жив, простре и обретеся мертв.
Отрок же во ужасе надолзе быв. И разуме истинно, яко умре, и сня с него драгия ризы и всю коньскую зъбрую, и облече на него смиренныя своя одежды, ископа землю и погребе его ту со слезами, и нощь ту преспа у гроба его. Тимофеи же явися ему у гроба своего благодарение воздавая ему, яко: «Тебе ради приях от бога прощение грех своих. Да возми кони мои со всем, еже на них, за труды своя, и иди отсюду на Русь и поминаи меня до живота своего молением и молитвою и милостынею и прощением».
Отрок же на утрие простився у гроба его и взя кони оба драгия Тимофеевы з збруею, и обрете на них басманы великие, полны насыпаны злата, и сребра и драгих каменеи, и всед на конь и поеде на Русь радуяся и веселяся.
И приехав к Москве и подробну поведа о Тимофеи, еже случися ему, великому московскому князю, и митрополиту, и како погребе его, и како его виде во сне. И оставльшаяся вся показа им. Князь же и митрополит удивишася о сем и прославиша бога, како покаянием и слезами очистився, и простишася греси его, и душа его спасена бысть. Князь же и митрополит все имение тимофеево повелеста отроку тому отдати. Еще же к тому князь и земли удел даде ему.
Сия же повесть многа лет ненаписана бысть, но тако в людех в повестех ношашеся. Аз же слышах от многих сие и написах ползы ради прочитающим, да не отчаются согрешившии спасения своего, но притекут ко всемилостивому богу истинным покаянием и отпущение грехов получат, и жизнь вечную сподобятся прияти и в безконечныя веки на небеси с преподобными имут царьствовати. Аминь.
размещено 27.07.2011

(0.3 печатных листов в этом тексте)
  • Размещено: 01.01.2000
  • Автор: Нестеров И.В. (подгот.)
  • Размер: 12 Kb
  • © Нестеров И.В. (подгот.)
© Открытый текст (Нижегородское отделение Российского общества историков – архивистов). Копирование материала – только с разрешения редакции